Qrafik şer
Təmiz qar.
Bəyaz qar.
Gözünün qarasını ağardacaq qədər bəyaz qar.
Sağır zülmət.
Kor zülmət.
Gözünün ağını qaraldacaq qədər qara zülmət.
Gözlərin – qarlı bir gecə.
Mən – ... zülmətdə günlərlə yol arayan
zavallı yolçu.
1999
Təbəssüm missiyası
Təbəssümümü öldürmək istəyənləri
elə təbəssümümlə də
“öldürmək” istərdim
mən.
2000
Qarşıdakı ümidsizlik
Verəcəyim sədəqəylə
yolun qırağında, oturduğu yerdəcə mürgüləyən
və hər şeydən əlini üzən dilənçini
ona boy verməyən bu yoxsulluqdan
qurtarmayacağımı bildiyimdən
əlimdəki qəpik-quruşu
onu oyatmağa dəymədiyi üçün
səssizcə
əski mis qaba qoyuram.
1994
Həndəsi edam
Şair dostum İsmayıl Bayramoğluna
Şaquli bir müstəvi,
yəni polad gilyotina bıçağı,
ona perpendikulyar yerləşən müstəvini,
yəni bədənimi,
boğaz nahiyəsində kəsdiyi zaman
bir alma misalı diyirlənəcək kürə -
başım olacaq.
2000
Alatoran
